11-13 iyun tarixlərində Topçubaşov Mərkəzinin tədqiqatçıları Murad Muradov və Simona Skotti Şərqi Avropa və postsovet siyasəti üzrə akademik tədqiqatçılar və siyasi ekspertlər üçün ən mühüm illik tədbirlərdən biri olan Şərqi Avropa və Avrasiya Tədqiqatları üzrə VII illik Tartu konfransında iştirak ediblər.

İyunun 13-də onlar diplomatiya və münaqişələrlə bağlı müzakirələrə qoşulublar: Simona Skotti Cənubi Qafqazda Türkiyənin təhlükəsizlik siyasəti çərçivəsində Rusiya-Türkiyə Birgə Monitorinq Mərkəzi haqqında araşdırmasını təqdim edib. Murad Muradov isə "Demokratik sülh nəzəriyyəsi və Dağlıq Qarabağ: nəzəri və praktiki aspektlər" adlı məruzəsini təqdim edib. Onların təqdimatları fikir mübadiləsi və geniş müzakirələrlə davam edib. 

Topçubaşov Mərkəzinin nümayəndələri öz panelləri ilə yanaşı, Rusiya alyansları, NATO-nun şərq Qonşuluğunun təhlükəsizlik arxitekturası, Rusiya-Qərb münasibətlərində təhdidlərin qurulması, Rusiyanın Ukraynaya hücumundan sonra Baltik regionu, Rusiya təcavüzünün nəticələri, separatizm və ayrılma, yeni strateji mühitdə Aİ, Moldova, Gürcüstan və Azərbaycanda tarixi yaddaş siyasəti və indiki müharibədən öyrənilən hərbi strategiya dərslərinə həsr olunmuş panel müzakirələrində və dəyirmi masalarda iştirak ediblər.